ساغر صدیقی

ہے دعا یاد مگر حرفِ دعا یاد نہیں
میرے نغمات کو اندازِ نوا یاد نہیں

ہم نے جن کے لیے راہوں میں بچھایا تھا لہو
ہم سے کہتے ہیں وہی عہدِ وفا یاد نہیں

زندگی جبرِ مسلسل کی طرح کاٹی ہے
جانے کس جرم کی پائی ہے سزا، یاد نہیں

میں نے پلکوں سے درِ یار پہ دستک دی ہے
میں وہ سائل ہوں جسے کوئی صدا یاد نہیں

کیسے بھر آئیں سرِ شام کسی کی آنکھیں
کیسے تھرائی ستاروں کی ضیا یاد نہیں

صرف دھندلائے ستاروں کی چمک دیکھی ہے
کب ہوا کون ہوا مجھ سے خفا یاد نہیں

آؤ اک سجدہ کریں عالمِ مدہوشی میں
لوگ کہتے ہیں کہ ساغر کو خدا یاد نہیں

Advertisements

میں نہیں مانتا،حبیب جالب

دیپ جس کا محلات ہی میں جلے
چند لوگوں کی خوشیوں کو لے کر چلے
وہ جو سائے میں ہر مصلحت کے پلے
ایسے دستور کو، صبح بےنور کو
میں نہیں مانتا، میں نہیں مانتا

میں بھی خائف نہیں تختہ دار سے
میں بھی منصور ہوں کہہ دو اغیار سے
کیوں ڈراتے ہو زنداں کی دیوار سے
ظلم کی بات کو، جہل کی رات کو
میں نہیں مانتا، میں نہیں مانتا

پھول شاخوں پہ کھلنے لگے،تم کہو
جام رندوں کو ملنے لگے،تم کہو
چاک سینوں کے سلنے لگے ،تم کہو
اِس کھلے جھوٹ کو، ذہن کی لوٹ کو
میں نہیں مانتا، میں نہیں مانتا

تم نے لوٹا ہے صدیوں ہمارا سکوں
اب نہ ہم پر چلے گا تمھارا فسوں
چارہ گر میں تمہیں کس طرح سے کہوں
تم نہیں چارہ گر، کوئی مانے، مگر
میں نہیں مانتا، میں نہیں مانتا

اے عشق ہماری گلیوں میں

یوں  دل  نہ  لگے  نہ  درد  اٹھے
مت  روز  ملو  تو   اچھا   ہے
نہ  پیار  بڑھے  نہ  جھگڑا  ہو
تم   دور   بسو   تو   اچھا    ہے

کسی پھول سے ملتے چہرے کو
مری   دنیا   دیکھنا   چاہے   گی
گر  پاس  تمہارے  کچھ  بھی  نہیں
پردے  میں   رہو  تو   اچھا   ہے

لے  کر   زنجیریں   ہاتھوں   میں
کچھ   لوگ  تمہاری  تاک  میں  ہیں
اے  عشق   ہماری   گلیوں   میں
نہ   اور   پھرو   تو   اچھا    ہے

https://pakistanistoday.wordpress.com/wp-admin/

 شاعری

آ جا  کہ  ابھی  ضبط  کا  موسم  نہیں  گزرا
آ جا کہ   پہاڑوں  پہ  ابھی  برف  جمی  ہے
خوشبو کے جزیروں  سے ستاروں  کی  حدوں  تک
اس شہر  میں  سب کچھہ ہے  اک  تیری  کمی  یے

پروین شاکر